Sipas gazetës gjermane BILD, Kylian Mbappe është angazhuar personalisht në afrimin e mesfushorit ofensiv Michael Olise te Real Madrid. Gjatë periudhës së Kupës së Botës, dy futbollistët e kombëtares franceze zhvilluan bisedime mbi vizionin dhe projektin sportiv të klubit madrilen.
Mbappe i ka propozuar Olises formimin e një dysheje sulmuese te gjigantët spanjollë, duke e përshkruar bashkëpunimin e tyre si një "dyshe perfekte". Përveç projektit sportiv, raportohet se Mbappe i ka folur 24-vjeçarit edhe për kushtet e jetesës në kryeqytetin spanjoll, duke përfshirë klimën dhe ofertën e gjerë të qytetit. Michael Olise ka shprehur gatishmërinë për t'u transferuar në "Santiago Bernabeu".
Procesi, megjithatë, pritet të përballet me vështirësi në fazën e negociatave. Bayern Munich e konsideron lojtarin një element kyç të skuadrës dhe synon ta mbajë atë nën kontratë. Deri në këtë moment, nuk është paraqitur ende asnjë ofertë zyrtare nga Real Madrid drejt klubit gjerman, duke e lënë çështjen në fazën e konsultimeve informale.