Real Madridi konfirmoi lëndimin e sulmuesit kryesor Kylian Mbappé pas barazimit 1-1 ndaj Real Betisit. Testet mjekësore zbuluan një problem në muskulin semitendinosus të kofshës së majtë, duke e bërë francezin shumë të dyshimtë për përballjen me Barcelonën më 10 maj në Camp Nou.
Klubi mbretëror nuk ka dhënë detaje për kohëzgjatjen e mungesës. Sipas Marcas, Mbappé do të mungojë ndaj Espanyolit, por do të përpiqet të jetë gati për El Clasico-n. Kjo ndodh në një moment kur Los Blancos renditen 11 pikë pas liderëve katalanas në kampionat.
Ky nuk është i pari problem fizik për Mbappén këtë sezon. Ai ka vuajtur nga disa lëndime, çka ka ngritur shqetësime për gjendjen e tij në kombëtaren e Francës para Botërorit 2026.