Sulmuesi francez Kylian Mbappe, lojtar i Real Madridit, mori pjesë në një sfidë të organizuar nga kanali i YouTuber-it Fiago, ku iu kërkua të rendiste gjashtë futbollistë legjendarë të Kupës së Botës pa pasur njohuri paraprake për emrat që do t’i shfaqeshin.
Në përfundim të sfidës, renditja e bërë nga Mbappe është si vijon:
• Pelé: Vendi i parë (fitues i tre titujve botërorë).
• Lionel Messi: Vendi i dytë (kampion bote me Argjentinën).
• Diego Maradona: Vendi i tretë (fitues i Botërorit 1986).
• Zinedine Zidane: Vendi i katërt (hero i Francës në vitin 1998).
• Kylian Mbappe: Vendi i pestë.
• Michel Platini: Vendi i gjashtë.
Duke shpjeguar zgjedhjet e tij, Mbappe argumentoi se vendosja e Pelé-së në krye bazohet në rekordin e tij unik me tre trofe të fituar (1958, 1962 dhe 1970). Ndërsa për Michel Platinin, sulmuesi francez vlerësoi se ndikimi i tij më i madh në karrierë ka qenë në Kampionatin Evropian. Në lidhje me veten, ai deklaroi: "Në Kupën e Botës kam bërë më shumë se Platini".