Dy pandat gjigante, Ping Ping prej 6 vjetësh dhe Fu Shuang prej 5 vjetësh, kanë mbërritur në Shtetet e Bashkuara pas një marrëveshjeje të arritur ndërmjet presidentit amerikan Donald Trump dhe homologut të tij kinez Xi Jinping. Transporti i kafshëve u realizua nga kompania FedEx me një avion Boeing 777 dhe shënon një zhvillim të rëndësishëm në kuadër të bashkëpunimit dypalësh.
Pandat do të qëndrojnë për 10 vitet e ardhshme në Kopshtin Zoologjik të Atlantës. Kafshët u përzgjodhën pas një vlerësimi të kujdesshëm të moshës, gjendjes shëndetësore, veçorive gjenetike dhe temperamentit të tyre. Përpara nisjes nga Chengdu, ato iu nënshtruan një procesi trajnimi për t'u ambientuar me kafazin e transportit dhe zhurmat e avionit. Sipas marrëveshjes, pandat dhe pasardhësit e tyre mbeten pronë e Kinës dhe do të rikthehen në këtë vend në të ardhmen.
Pas mbërritjes në Atlanta, kafshët do të vendosen në një periudhë karantine prej rreth një muaji, ku do të monitorohen nga veterinerë dhe kujdestarë kinezë përpara se të shfaqen për publikun. Kopshti Zoologjik i Atlantës ka bërë përgatitjet e nevojshme për strehimin e tyre, duke rinovuar mjediset e qëndrimit dhe duke siguruar furnizim të qëndrueshëm me bambu.
Kjo lëvizje është pjesë e praktikës së njohur si “diplomacia e pandave”, përmes së cilës Kina synon të forcojë marrëdhëniet diplomatike. Përveç këtij procesi, takimi i fundit mes liderëve Trump dhe Xi rezultoi në arritjen e dakordësisë për zgjatjen e armëpushimit tregtar dhe krijimin e një linje komunikimi mbi çështjet e inteligjencës artificiale.
Përditësime
Pandat Ping Ping dhe Fu Shuang do të qëndrojnë në karantinë për një muaj përpara se të ekspozohen për publikun në Kopshtin Zoologjik të Atlantës.