Fundjava dhe festa e Fitër Bajramit kanë rritur ndjeshëm numrin e hyrjeve në Shqipëri nga qytetarët e Kosovës. Lëvizjet e shumta kanë nisur që në orët e para të mëngjesit të 21 marsit 2026.
Sipas të dhënave të Drejtorisë Vendore për Kufirin dhe Emigracionin Kukës, vetëm paradite nëpërmjet pikës kufitare të Morinës kanë hyrë mbi 3 mijë persona me mbi 900 mjete të vogla, pa llogaritur autobusët me grupe të organizuara. Një numër i konsiderueshëm udhëtarësh kanë kaluar kufirin edhe me motorë.
Në drejtim të kundërt, nga Shqipëria drejt Kosovës, numri i lëvizjeve ka qenë më i ulët. Sipas të dhënave të palës kosovare në pikën kufitare të Vërmicës, drejt Kosovës kanë hyrë 1 mijë e 850 shqiptarë me rreth 700 mjete.
Të dyja pikat kufitare funksionojnë me procedurë të përshpejtuar dhe pa kontrolle të detajuara për qytetarët që udhëtojnë me targa të Kosovës gjatë fundjavave dhe festave zyrtare. Kjo procedurë zbatohet deri në fund të muajit prill, ndërsa në ditët e tjera të javës kontrollet kryhen normalisht.
Pavarësisht fluksit të lartë, nuk janë shënuar radhë apo pritje të gjata, pasi autoritetet kufitare punojnë me ritëm të përshpejtuar.
Përditësime
14,307 kosovarë hynë në Shqipëri dhe 16,213 shqiptarë në Kosovë gjatë fundjavës (e shtunë-diel), sipas autoriteteve kufitare.
Kaluan kufirin 6,358 mjete kosovare dhe 7,432 mjete shqiptare.
Aksi rrugor Morinë–Kukës mbetet i ngarkuar.
Pa kontrolle për targa të Shqipërisë dhe Kosovës; procedurë e përshpejtuar për targa të huaja.