Komisioni Qendror i Zgjedhjeve (KQZ) ka njoftuar se po vazhdon periudha e aplikimit për regjistrim të votuesve jashtë Kosovës, e cila ka filluar më 6 maj 2026 dhe përfundon më 17 maj 2026.
Zëdhënësi i KQZ-së, Valmir Elezi, ka deklaruar se deri më 10 maj 2026, ora 10:00, përmes platformës elektronike janë pranuar 36.154 kërkesa, prej të cilave janë aprovuar 25.376, refuzuar 2.961 dhe 7.797 janë në pritje për shqyrtim.
Nga aplikimet e aprovuara, 6.280 shtetas janë regjistruar për votim fizik në përfaqësi diplomatike, 701 për dërgimin e pakos me fletëvotim në kutinë postare të KQZ-së në Kosovë dhe 18.395 për dërgimin e saj në kutinë postare jashtë Kosovës.
Para nisjes së regjistrimit, KQZ ka miratuar listën e qendrave të votimit në përfaqësi diplomatike dhe ka përcaktuar numrin maksimal të votuesve për votim fizik më 6 qershor. Procesi planifikohet në 48 përfaqësi diplomatike, pra 33 ambasada dhe 15 konsullata, me gjithsej 70 vendvotime. Kapaciteti maksimal për votim fizik është 66.450 votues.
KQZ ka sqaruar se kufizimi vlen vetëm për votimin fizik në përfaqësi diplomatike, ndërsa regjistrimi për votim me postë është i pakufizuar. Nëse plotësohet numri maksimal në një përfaqësi, aplikuesit udhëzohen drejt formave të votimit me postë, sipas parimit të kohës së aplikimit.
Sipas KQZ-së, pas zgjedhjeve të mëparshme janë rregulluar çështje të ndryshme dhe janë vendosur kritere të reja, si minimumi i 50 votuesve të regjistruar për të organizuar votim fizik në një përfaqësi diplomatike.