Përfaqësuesja shqiptare e futbollit do të zhvillojë dy ndeshje vendimtare në fund të muajit mars për t'u kualifikuar në Kupën e Botës. Në gjysmëfinalen e play-off-it, kuqezinjtë do të përballen me Poloninë, ndërsa në finale do të presin fituesin e çiftit Ukrainë-Suedi.
Mbrojtja, e cila kishte qenë pikë force në kualifikuese, tani është e dobësuar nga dëmtimet dhe forma e keqe e lojtarëve. Ardian Ismajli dhe Berat Gjimshiti janë larguar të dëmtuar, Mario Mitaj ka mbetur në tribunë nga trajneri, ndërsa Elseid Hysaj nuk është në planet e klubit të tij për pjesën e mbetur të sezonit.
Situata e Ardian Ismajlit
Mbrojtësi i Torinos u largua nga fusha pas 20 minutash në ndeshjen ndaj Komon, për shkak të një shqetësimi në pjesën e pasme të kofshës. Vizitat mjekësore kanë konstatuar një tërheqje muskulare, që e lë jashtë fushave për rreth një muaj. Ismajli ka vuajtur shpesh dëmtime në kampionatin italian pas kalimit te Torino, duke humbur edhe grumbullime me Kombëtarën. Ai pritet të rikthehet në fund të muajit shkurt ose në javën e parë të marsit, duke e vënë në dyshim gatishmërinë për ndeshjet e play-off-it.