Mbyllja e pjesshme e qeverisë së Shteteve të Bashkuara ka hyrë në histori si më e gjata ndonjëherë, ndërsa përplasjet politike në Uashington vazhdojnë për financimin e Departamentit të Sigurisë Kombëtare (DHS), raporton BBC.
Të dielën, kriza arriti në ditën e 44-të, duke tejkaluar rekordin e mëparshëm të ndërprerjes së financimit, i cili përfundoi në nëntor të vitit 2025.
Ngërçi ka shkaktuar pasoja të dukshme në fushën e transportit, veçanërisht në aeroportet amerikane. Mungesa e stafit të Administratës së Sigurisë së Transportit (TSA) ka krijuar radhë të gjata dhe vonesa të mëdha. Mijëra punonjës të TSA-së kanë mbetur pa paga, çka ka bërë që një pjesë e tyre të mos paraqitet në punë. Rreth 500 agjentë kanë dhënë dorëheqje, sipas të dhënave nga DHS. Vetëm të premten, mbi 3.560 punonjës munguan, që përbën më shumë se 12% të fuqisë punëtore të kësaj agjencie.
Administrata ka ndërmarrë hapa për të zbutur krizën. Presidenti Donald Trump ka nënshkruar një urdhër ekzekutiv që synon pagesën e punonjësve të TSA-së brenda ditëve të para të javës së ardhshme. Megjithatë, kjo lëvizje mund të përballet me sfida ligjore. Ekspertë ligjorë kanë vënë në dyshim ligjshmërinë e saj, duke argumentuar se bie ndesh me Kushtetutën amerikane, e cila i jep Kongresit autoritetin për miratimin e shpenzimeve federale.