Projekti turistik i planifikuar në zonën e Zvërnecit dhe Pishë Poros ka tërhequr vëmendjen e mediave në Greqi. Televizioni Star Channel News i ka kushtuar një kronikë të veçantë këtij investimi, duke e cilësuar atë si një zhvillim me ndikim të rëndësishëm për ekonominë shqiptare dhe konkurrencën turistike në rajon.
Sipas raportimeve, investimi synon shndërrimin e zonës në një destinacion luksoz, me infrastrukturë dhe hotele me pesë yje. Sipërfaqja e parashikuar për zhvillim arrin në 2.5 milionë metra katrorë, ndërsa vlera e përgjithshme pritet të kalojë 4 miliardë dollarë. Në kronikat greke vlerësohet se fokusi drejt një turizmi elitar mund të ndikojë në ekuilibrat rajonalë, duke vënë në konkurrencë destinacione të njohura greke, si Korfuzi dhe Kefalonia.
Në raportime përmendet gjithashtu përfshirja e Ivanka Trump në iniciativë, si dhe pjesëmarrja e një grupi investitorësh të huaj, ku bëjnë pjesë dy miliarderë nga Katari, krahas pesë investitorëve shqiptarë. Media thekson se ky projekt pasqyron zhvillimin gjeopolitik dhe ekonomik të Shqipërisë në nivel rajonal.