Gazeta italiane Il Fatto Quotidiano ka publikuar një reportazh mbi protestat e vazhdueshme në Shqipëri, duke vënë theksin te kërkesat e qytetarëve për ndryshime të thella politike dhe ekonomike. Protestat, të cilat zhvillohen çdo mbrëmje në Sheshin Skënderbej, vijojnë prej 24 ditësh.
Sipas artikullit, lëvizja e njohur si Revolucioni i Flamingove – e cila nisi fillimisht si kundërshtim ndaj një projekti turistik të lidhur me interesa pranë dhëndrit dhe vajzës së Donald Trump – është shndërruar në një formë shprehjeje për pakënaqësi më të gjera sociale. Pjesëmarrësit, përfshirë të rinj, të moshuar dhe përfaqësues të diasporës, denoncojnë pagat që variojnë nga 400 deri në 500 euro në muaj, të cilat nuk përballojnë dot rritjen e kostove të jetesës.
Në raportim citohet rasti i Gjergjit, 63 vjeç, i cili pas dy dekadash në Itali, u kthye në atdhe dhe shprehet se çmimet e produkteve bazë në Shqipëri janë bërë më të larta se në shtetin italian. Protestuesit identifikojnë korrupsionin dhe krimin e organizuar si pengesa kryesore për integrimin e vendit në Bashkimin Evropian.
Krahas kërkesave për përmirësimin e mirëqenies, një pjesë e protestuesve kërkojnë dorëheqjen e kryeministrit Edi Rama. Organizatorët theksojnë se numri i pjesëmarrësve është në rritje dhe se mobilizimi do të vazhdojë deri në arritjen e qëllimeve të tyre.