Një megatsunami i fuqishëm ndodhi verën e kaluar në fjordin Tracy Arm, në juglindje të Alaskës, dhe tani analizat shkencore e kanë identifikuar si valën e dytë më të lartë të regjistruar ndonjëherë në botë. Ngjarja u zhvillua më 10 gusht 2025, kur një rrëshqitje masive toke shkaktoi shembjen e rreth 64 milionë metra kub shkëmbi në ujë, një sasi e barabartë me 24 Piramida të Mëdha të Gizës. Kjo ndodhi në më pak se një minutë dhe gjeneroi një valë me lartësi 482 metra.
Analiza e publikuar në revistën "Science" tregon se fenomeni kaloi kryesisht pa u vënë re në kohën e tij për shkak të izolimit të zonës dhe orës së hershme të mëngjesit. Kjo parandaloi përfshirjen e anijeve turistike që frekuentojnë fjordin. Gjeologu Bretwood Higman, i cili vizitoi zonën disa javë më pas, e përshkroi ngjarjen si një "katastrofë të shmangur për pak" dhe paralajmëroi se njerëzit mund të mos jenë gjithmonë kaq me fat.
Dallimi nga cunami klasikë
Megatsunami të tillë lindin nga rrëshqitje toke ose shembje shkëmbinjsh që bien në masa uji, zakonisht lokale dhe të shpejta në zhdukje. Ndryshe, cunami klasikë krijohen në oqeanin e hapur nga tërmete ose vullkane nënujore dhe mund të përshkojnë mijëra kilometra, si ai i Japonisë në 2011.
Megatsunami më i madhi
Rekordi absolut mbahet nga ngjarja e 1958-s në gjirin Lituya të Alaskës, me lartësi mbi 500 metra, pas një tërmeti me magnitudë 7.8-8.3 Richter.
Lidhja me ndryshimet klimatike
Shkencëtarët theksojnë se shkrirja e akullnajave ka luajtur rol kyç, duke hequr mbështetjen natyrale për formacionet shkëmbore të pjerrëta. Kjo rrit rrezikun e fenomeneve të ngjashme në zonat e fiordeve të Alaskës, për shkak të terrenit të pjerrët dhe aktivitetit sizmik.