Kryeministrja e Italisë Giorgia Meloni ka kritikuar paralajmërimin e Presidentit të SHBA-së Donald Trump për rritjen e tarifave doganore ndaj 8 vendeve evropiane që kanë kontribuar në sigurinë e Groenlandës.
Duke folur me gazetarët në Seul, ku ndodhet për një vizitë zyrtare, Meloni deklaroi se ka zhvilluar një bisedë telefonike me Trumpin disa orë më parë. "Besoj se vendosja e tarifave të reja do të ishte gabim. I thashë këtë mendim Donald Trump-it", u shpreh ajo, duke theksuar nevojën për të rifilluar dialogun dhe për të shmangur përshkallëzimin.
Meloni bëri të ditur se ka folur edhe me Sekretarin e Përgjithshëm të NATO-s Mark Rutte, i cili e ka konfirmuar se Aleanca ka nisur një proces pune për sigurinë në Arktik. Ajo nënvizoi ekzistencën e një keqkuptimi mbi qëllimin e pranisë ushtarake europiane në Groenlandë, duke sqaruar se kjo iniciativë nuk synon Shtetet e Bashkuara, por rritjen e sigurisë ndaj aktorëve të tjerë potencialisht armiqësorë.
Kryeministrja italiane cilësoi situatën si "problem mirëkuptimi dhe komunikimi" midis Evropës dhe SHBA-së. Ajo shtoi se Trumpi ka qenë i gatshëm të dëgjojë, por mesazhi europian nuk është kuptuar qartë nga ana amerikane. Meloni paralajmëroi kontakte të mëtejshme me liderë të tjerë europianë për të ruajtur dialogun dhe për të punuar drejt objektivave të përbashkëta në kuadër të NATO-s.