Giorgia Meloni, kryeministre e Italisë, ka reaguar për shpërndarjen në rrjete sociale të disa fotografive të rreme që e paraqesin atë.
Ajo deklaroi se këto imazhe janë krijuar me inteligjencë artificiale dhe po përdoren nga kundërshtarë politikë për sulme. Meloni i cilësoi ato të pavërteta dhe theksoi se krijuesi i tyre, të paktën në një rast, e ka "përmirësuar" pamjen e saj.
Në postimin e saj, ajo shkroi: "Këto ditë po qarkullojnë disa foto të mia të rreme, të krijuara me inteligjencë artificiale dhe të paraqitura si të vërteta nga ndonjë kundërshtar i zellshëm. Duhet të pranoj se ai që i ka realizuar, të paktën në rastin e bashkëngjitur, madje më ka ‘përmirësuar’ mjaft. Por mbetet fakti se, vetëm për të sulmuar dhe shpikur gënjeshtra, sot përdoret vërtet gjithçka. Megjithatë, çështja shkon përtej meje. Deepfake-t janë një mjet i rrezikshëm, sepse mund të mashtrojnë, manipulojnë dhe të godasin këdo. Unë mund të mbrohem. Shumë të tjerë jo. Prandaj duhet të vlejë gjithmonë një rregull: verifiko para se të besosh dhe mos e shpërnda para se të mendosh. Sepse sot i ndodh mua, nesër mund t’i ndodhë kujtdo."
Meloni nënvizoi se deepfake-t mashtrojnë dhe dëmtojnë këdo, duke u përdorur për manipulim dhe dezinformim.