Ministria për Europën dhe Punët e Jashtme ka reaguar në rrjetin social X për sulmin e fundit me raketë balistike të Iranit në hapësirën ajrore të Turqisë.
Në deklaratë thuhet se Republika Islamike e Iranit vijon të përshkallëzojë konfliktin, duke sulmuar jo vetëm fqinjët në Lindjen e Mesme, por edhe duke vënë në shënjestër Turqinë. Ministria vlerëson reagimin e shpejtë të NATO-s në mbrojtje të aleatëve.
“Shqipëria dënon fuqishëm sulmin e fundit me raketë balistike të regjimit iranian kundër Turqisë, një partner strategjik i Shqipërisë dhe aleat i çmuar në NATO. Ne qëndrojmë në solidaritet të plotë me Turqinë dhe me të gjithë aleatët në mbrojtje të territorit, sigurisë dhe unitetit të Aleancës”, shkruhet në reagim.
Sipas mediave turke, ky është sulmi i tretë me raketë balistike të lëshuar nga Irani dhe i neutralizuar nga mjetet e mbrojtjes ajrore të NATO-s në Mesdheun Lindor. Raketa u rrëzua të hënën, pas një incidenti tjetër brenda pesë ditësh.
Reagimi vjen në kontekstin e tensionave në Lindjen e Mesme.
Përditësime
MEPJ ka publikuar citatin e plotë të deklaratës: "Edhe një herë, NATO ka dëshmuar aftësinë e saj të jashtëzakonshme dhe reagimin e shpejtë në mbrojtjen e Aleatëve dhe të sigurisë së tyre."
Deklarata zyrtare në X përmend "fqinjët e saj në Lindjen e Mesme".