Një incident ka ndodhur mbrëmjen e së shtunës në Lipjan të Kosovës, kur Policia e Kosovës ka tentuar të ndalojë një veturë tip Mercedes ngjyrë hiri me targa lokale. Policia kishte informacione se mjeti përdorej për shitje substancash narkotike.
Gjatë përpjekjes për ndalim, vetura ka goditur automjetin zyrtar policor dhe ka vazhduar ikjen. Pas një ndjekjeje të shkurtër, zyrtarët policorë kanë arritur ta ndalin mjetin dhe të arrestojnë dy persona meshkuj kosovarë që gjendeshin brenda.
Gjatë arrestimit, një zyrtar policor ka pësuar lëndime të lehta trupore. Me vendim të prokurorit, pas intervistimit, njëri nga të arrestuarit është liruar në cilësinë e dëshmitarit në shtëpi, ndërsa tjetri është dërguar në mbajtje për 48 orë në cilësinë e të dyshuarit.
Gjatë kontrollit të automjetit, policia ka gjetur dhe konfiskuar 24 qese të vogla me substanca narkotike, përkatësisht rreth 18.09 gram kokainë dhe 6.75 gram marihuanë. Rasti është cilësuar si “Shkaktim i rrezikut të përgjithshëm” dhe hetimet vazhdojnë.