Përfaqësues të mërgatës shqiptare kanë njoftuar se më 26 shtator do të zhvillohen protesta në disa qytete evropiane si shenjë kundërshtimi ndaj vendimeve të Gjykatës Speciale për ish-krerët e UÇK-së.
Në Gjermani, tubimet janë paralajmëruar në dy lokacione të ndryshme:
- Në Dusseldorf, protesta pritet të nisë në orën 17:30.
- Në Ulm, tubimi është planifikuar të fillojë në orën 18:30, sipas informacioneve të konfirmuara nga organizatorët që theksojnë se janë pajisur me lejet përkatëse nga autoritetet lokale.
Ndërkohë, në kryeqytetin e Finlandës, Helsinki, protesta do të mbahet në Kansalaistori me fillim nga ora 17:00.
Organizatorët synojnë që përmes këtyre tubimeve të shprehin mbështetjen për Hashim Thaçin, Kadri Veselin, Jakup Krasniqin dhe Rexhep Selimin. Pjesëmarrësit theksojnë se kjo nismë shërben si një thirrje për solidaritet, duke kërkuar që zëri i mërgatës të dëgjohet përballë atyre që i konsiderojnë si vendime të padrejta. Qytetarët, si në Kosovë ashtu edhe në diasporë, janë angazhuar në forma të ndryshme për të shprehur mbështetjen për të akuzuarit.
Përditësime
Lëvizjet protestuese ndaj vendimeve të Gjykatës Speciale po zgjerohen. Aktivistët njoftuan një protestë të re për të dielën, më 27 shtator, para zyrave të OKB-së në Gjenevë. Ndërkohë, qytetarët në Prishtinë po zhvillojnë protestën 'Jo në emrin tim' për ditën e shtatë radhazi, çdo mbrëmje në orën 21:00. Zhvillimet pasojnë shpalljen e dënimeve me gjithsej 81 vite burgim për ish-krerët e UÇK-së: Hashim Thaçi dhe Jakup Krasniqi u dënuan me nga 25 vite, Kadri Veseli me 18 vite dhe Rexhep Selimi me 13 vite burgim.
Qindra qytetarë vazhduan të martën protestën 'Jo në emrin tim' në Prishtinë, duke kërkuar mbështetje për ish-krerët e UÇK-së. Në tubim folën veteranë të luftës, këngëtarë dhe gazetarë, të cilët kundërshtuan dënimet e Gjykatës Speciale. Ndërkohë, dokumentet zyrtare konfirmuan akuzat specifike për të cilat u dënuan Hashim Thaçi, Kadri Veseli, Jakup Krasniqi dhe Rexhep Selimi, duke përfshirë ndalimin e paligjshëm, trajtimin mizor, torturën dhe vrasjen.