Një zjarr i fuqishëm ka përfshirë një lokal në rrugën Kastamonis në zonën e Nea Jonias në Athinë, duke shkaktuar shkatërrimin pothuajse të plotë të ambientit. Për shuarjen e flakëve, të cilat u përhapën edhe në tri banesa të vendosura mbi godinë, ndërhynë 18 zjarrfikës me pesë automjete dhe një mjet special me shkallë, sipas Java News. Incidenti ka shkaktuar dëme të konsiderueshme materiale për banorët e ndërtesës, ndërsa autoritetet greke vijojnë operacionet e sigurisë në zonë.
Autoritetet greke kanë nisur hetimet për të zbardhur rrethanat e ngjarjes. Sipas burimeve policore, po ndiqet pista e zjarrvënies së qëllimshme. Nga ana tjetër, dëshmitë e banorëve sugjerojnë se para rënies së zjarrit është dëgjuar një shpërthim i fuqishëm, çka ka nxitur zjarrfikësit të verifikojnë edhe mundësinë e një defekti teknik, siç mund të jetë shpërthimi i një bombole gazi.
Vëmendja ndaj këtij lokali është shtuar pasi bëhet fjalë për të njëjtin ambient ku më 22 shkurt 2023 u ekzekutua me armë zjarri 37-vjeçari shqiptar Pëllumb Islami. Pavarësisht përputhjes së vendndodhjes, policia greke nuk ka deklaruar ende nëse incidenti i sotëm ka ndonjë lidhje direkte me vrasjen e shtetasit shqiptar apo me persona të përfshirë në atë ngjarje. Grupet hetimore vijojnë mbledhjen e provave dhe dëshmive për të përcaktuar nëse ngjarja është një incident aksidental apo një veprim i qëllimshëm kriminal.
Përditësime
Ekipet zjarrfikëse me 18 efektivë dhe mjete të specializuara intervenuan në rrugën Kastamonis për të shuar zjarrin në lokalin ku u vra Pëllumb Islami.