Kancelari gjerman Friedrich Merz deklaroi të mërkurën se avionët luftarakë gjermanë mund të mbajnë armë bërthamore britanike dhe franceze. Ky sugjerim erdhi pas shtytjes së tij për një mbrojtje bërthamore evropiane, ndërsa vendet si Gjermania po shqyrtojnë alternativa përtej SHBA-së.
Merz zbuloi se është në diskutime me fuqi të tjera evropiane, veçanërisht me Francën, për krijimin e një sistemi parandalues bërthamor në Evropë. Ai theksoi se një armatim bërthamor gjerman nuk është në diskutim, por avionët gjermanë tashmë mund të mbajnë armë bërthamore amerikane. "Do të ishte e mundur që kjo të zbatohej edhe për armët bërthamore britanike dhe franceze", tha ai në podcastin gjerman Machtwechsel.
Për dekada, siguria evropiane është mbështetur te gatishmëria e Uashingtonit për ndërhyrje në konflikte të mundshme, me arsenalin bërthamor amerikan si element kyç i parandalimit. Megjithatë, rizgjedhja e presidentit amerikan Donald Trump, komentet e tij përçmuese ndaj NATO-s dhe kërcënimet për aneksimin e Grenlandës kanë ngritur dyshime mbi vazhdueshmërinë e kësaj varësie.
Marrëveshja New START, që kufizon arsenalet bërthamore strategjike të Russisë dhe SHBA-së, skadoi në fillim të shkurtit, pa përpjekje të rëndësishme për rinovim. Merz përmendi se Franca ka ofruar më parë përfshirjen e Gjermanisë në parandalimin e saj bërthamor dhe se një ofertë e tillë "nuk mund të lihet thjesht pa u shqyrtuar në këto kohë".
Sekretari i përgjithshëm i NATO-s, Mark Rutte, deklaroi në Konferencën e Sigurisë në Mynih se askush në Evropë nuk po kërkon të zëvendësojë ombrellën bërthamore amerikane. Sipas tij, diskutimet aktuale duhen parë si shtesë për forcimin e kuadrit ekzistues.