Kancelari gjerman Friedrich Merz tha në një intervistë për gazetaren e Bloomberg-ut, Francine Laqua, se Evropa po nënvlerëson kërcënimin që Rusia paraqet për shoqëritë evropiane. Intervista trajtoi gjithashtu luftën në Ukrainë dhe ndryshimet në politikën amerikane nën drejtimin e Donald Trumpit.
I pyetur nëse ishte i përgatitur për një botë ku Shtetet e Bashkuara do të ishin aleate të Rusisë kundër Ukrainës, Merz tha se SHBA-ja e ka ndërprerë plotësisht financimin për Ukrainën që nga fillimi i vitit 2025. Sipas tij, për gati dy vjet mbështetja financiare është siguruar nga Koalicioni i të Gatshmëve, i përbërë nga vende evropiane dhe disa vende joevropiane. Ai e përshkroi këtë si barrë për buxhetet shtetërore dhe sfidë për Bashkimin Evropian, por tha se ndihma për Ukrainën do të vazhdojë deri në përfundimin e luftës.
Merz tha se në çdo takim përpiqet ta bindë Presidentin amerikan Donald Trump se një Evropë e qëndrueshme dhe një Bashkim Evropian i fortë janë edhe në interes të Shteteve të Bashkuara. Sipas tij, administrata amerikane ka ndryshuar mënyrën e veprimit në politikën globale nën drejtimin e Trumpit. Ai tha se Evropa e kupton këtë qasje dhe do të veprojë në mënyrë të pavarur, në përputhje me interesat e veta.
I pyetur për mbështetjen ndaj Ukrainës nëse SHBA-ja nuk jep ndihmë financiare, Merz tha se shpenzimet për mbrojtjen në kuadër të NATO-s janë rritur në 5 për qind të Prodhimit të Brendshëm Bruto. Ai përmendi bashkëpunimin me aleatët evropianë dhe Kanadanë, si dhe rolin e Gjermanisë si një nga kontribuuesit më të mëdhenj në mbështetjen mbrojtëse të Ukrainës. Sipas tij, rreth 60 për qind e qytetarëve gjermanë e mbështesin këtë politikë, ndonëse ka edhe kritikë.
Merz tha se synimi kryesor është të kontribuohet në përfundimin e luftës, jo në zgjatjen e saj. I pyetur për kushtet e përfundimit, ai u shpreh se Ukraina është shtet sovran dhe se ruajtja e integritetit të saj territorial është kusht themelor.
Në fund të intervistës, Merz tha se shqetësimi i tij kryesor është nënvlerësimi i kërcënimit rus. Sipas tij, lufta në Ukrainë është vetëm pjesë e një problemi më të gjerë: Rusia po përpiqet të destabilizojë rendin politik në kontinentin evropian. Ai tha se ambiciet e Moskës shkojnë përtej pushtimit të territoreve ukrainase dhe se Kremlini i sheh demokracinë, shoqëritë e hapura dhe integrimin evropian si kërcënime, duke synuar ta minojë suksesin e tyre.