Kancelari i Gjermanisë, Friedrich Merz, i ka dërguar një letër urimi kryeministrit të Kosovës, Albin Kurtit, me rastin e rizgjedhjes së tij në mandatin e ri qeverisës. Letra është publikuar nga Zyra e Kryeministrit të Kosovës më 22 mars 2026.
Në letër, Merz shkruan se përpara Kurtit dhe qeverisë së tij qëndrojnë detyra sfiduese. Ai shpreh bindjen se, me përvojën e Kurtit, do të merren vendimet e duhura për integrimin e mëtejshëm euro-atlantik të Kosovës, përfshirë përparime të tjera në dialogun e normalizimit të marrëdhënieve me Serbinë, të ndërmjetësuar nga Bashkimi Evropian.
Merz thekson se Kosova ka në Gjermani një partner të fortë dhe të besueshëm për këto detyra. Ai uroi Kurtin me fat dhe sukses në vazhdimin e mandatit, duke shprehur kënaqësi për thellimin e marrëdhënieve të ngushta mes vendeve.
Teksti i plotë i letrës:
"I nderuar zoti Kryeministër,
për rizgjedhjen tuaj ju përgëzoj përzemërsisht. Gëzohem për mundësinë që, së bashku me ju, të thellojmë më tej marrëdhëniet e ngushta dhe miqësore mes vendeve tona.
Përpara jush dhe qeverisë suaj qëndrojnë detyra sfiduese. Jam i bindur se, me përvojën tuaj, do të merrni vendimet e duhura dhe të nevojshme për integrimin e mëtejshëm euro-atlantik të Kosovës. Këtu përfshihen edhe përparime të tjera në dialogun e normalizimit të ndërmjetësuar nga BE-ja me Serbinë.
Të jeni i sigurt se Kosova, në këto detyra, ka në Gjermani një partner të fortë dhe të besueshëm në krahun e saj.
Ju uroj për vazhdimin e mandatit tuaj shumë fat dhe sukses.
Me përshëndetje të përzemërta
Friedrich Merz
Kancelar i Republikës Federale të Gjermanisë"