Kancelari gjerman Friedrich Merz ka deklaruar se nuk do t'i këshillonte fëmijët e tij të studionin apo të punonin në Shtetet e Bashkuara. Ai tha se Amerika nuk është më “vendi i mundësive” si më parë për shkak të klimës sociale që është krijuar.
Deklarata u bë gjatë një konference me të rinj katolikë në Würzburg. Merz theksoi se polarizimi politik dhe social në SHBA ka arritur nivele shqetësuese dhe se edhe njerëzit më të arsimuar po e kanë të vështirë të gjejnë punë.
Reagimi erdhi menjëherë nga kampi i presidentit Donald Trump. Richard Grenell, ish-ambasador i SHBA-së në Gjermani, e quajti Merz “presidentin europian të shoqërisë anti-Trump” dhe tha se kancelari gjerman është pa strategji dhe kontrollohet nga media gjermane.
Marrëdhëniet mes Berlinit dhe Uashingtonit janë tensionuar muajt e fundit për shkak të mosmarrëveshjeve mbi luftën në Iran, Ukrainën dhe tarifat tregtare. Në fund të muajit të kaluar Merz kishte kritikuar administratën Trump për qëndrimin ndaj Iranit.