Një gjykatës në New Mexico urdhëroi më 21 tetor Meta Platforms të paguajë 25 miliardë dollarë, pasi një juri konstatoi se kompania kishte mashtruar konsumatorët lidhur me privatësinë e të dhënave. Çështja lidhet me pretendimet se të dhënat personale të miliona përdoruesve të Facebook-ut ishin siguruar pa pëlqimin e tyre nga një palë e tretë.
Prokurori i përgjithshëm i New Mexico-s e paditi Metën në vitin 2021, pas zbulimeve se Cambridge Analytica, firmë britanike e konsulencës politike e përfshirë në fushatën presidenciale të Donald Trumpit më 2016, kishte mbledhur të dhëna personale nga deri në 87 milionë përdorues të Facebook-ut përmes një aplikacioni të palës së tretë.
Shteti e akuzoi kompaninë se kishte mashtruar përdoruesit në New Mexico për personat që kishin qasje në të dhënat e tyre, mënyrën e trajtimit të gjuhës së urrejtjes dhe dezinformatave në platformë, si dhe politikat e tjera të brendshme. Sipas autoriteteve, Meta e dinte se palët e treta kishin qasje të gjerë në të dhënat personale dhe toleronte gjuhën e urrejtjes e përmbajtje të tjera të dëmshme kur kjo i sillte përfitime financiare. Kompania mohoi se kishte shitur të dhënat e përdoruesve dhe argumentoi se shteti nuk kishte dëshmuar se ndonjë konsumator ishte mashtruar realisht.
Më 25 shtator, juria konstatoi se 26 nga 29 deklarata të kompanisë dhe drejtuesve të saj lidhur me këto çështje ishin mashtruese. Ajo përcaktoi se Meta kishte kryer më shumë se 43 milionë shkelje të ligjeve të New Mexico-s për mbrojtjen e konsumatorëve. Numri u llogarit sipas përdoruesve të Facebook-ut ose banorëve të shtetit që kishin qenë audiencë e secilës deklaratë mashtruese. Ligji parashikon gjoba deri në 5 mijë dollarë për shkelje, dhe të ardhurat nga gjoba do të shkojnë për sistemin arsimor të shtetit.
Në seancën e 1 tetorit, avokatët e shtetit kërkuan gjobë prej 35 deri në 40 miliardë dollarësh. Meta kërkoi që shuma të kufizohej në 3,45 miliardë dollarë, duke argumentuar se një ndëshkim më i lartë mund t’i dekurajonte bizneset të vepronin në këtë shtet.
Ky është vendimi i dytë i rëndësishëm kundër Metës në New Mexico brenda gjashtë muajve. Në një proces të përfunduar në mars, juria konstatoi se kompania kishte mashtruar përdoruesit për sigurinë e të rinjve në Facebook, Instagram dhe WhatsApp. Meta u urdhërua të paguante 375 milionë dollarë gjoba civile dhe, pas një faze të dytë, 567 milionë dollarë në një fond të New Mexico-s për shëndetin mendor të adoleshentëve. Kompania u urdhërua gjithashtu të zbatonte masa shtesë për mbrojtjen e përdoruesve të rinj në Facebook dhe Instagram.