Kryeministri i Maqedonisë së Veriut, Hristijan Mickoski, njoftoi se sot është zhvilluar një takim pune i përqendruar te Axhenda e reformave dhe rrugëtimi i vendit drejt Bashkimit Evropian. Pjesë e takimit, përmes një lidhjeje virtuale, ishte edhe Gert Jan Kopman, drejtor i Drejtorisë së Përgjithshme për Zgjerim dhe Fqinjësi Lindore pranë Komisionit Evropian.
Në qendër të diskutimeve ishin arritjet e deritanishme, hapat e ardhshëm dhe bashkërendimi midis institucioneve. Qëllimi kryesor është sigurimi që proceset reformuese të zbatohen me efikasitet, brenda afateve të përcaktuara dhe në përputhje të plotë me prioritetet e vendosura.
Duke theksuar rëndësinë e këtyre masave, kryeministri Mickoski konfirmoi përkushtimin e qeverisë për të avancuar në reformat e nisura. Sipas tij, objektivi është krijimi i institucioneve më efikase, ofrimi i shërbimeve më cilësore për qytetarët dhe përshpejtimi i rrugës së vendit drejt anëtarësimit në familjen evropiane.