Kryeministri i Republikës së Maqedonisë së Veriut, Hristijan Mickoski, ka konfirmuar zyrtarisht se nuk ka ambicie për të kandiduar për postin e Presidentit të shtetit. Në një deklaratë për mediat, ai bëri të ditur se prioritet i tij mbetet drejtimi i partisë OBRM-PDUKM drejt një fitoreje të re të madhe ndaj LSDM-së në zgjedhjet e ardhshme parlamentare.
Duke folur për të ardhmen e tij, Mickoski theksoi se pas përfundimit të detyrës si Kryeministër, planifikon t'i rikthehet mësimdhënies në fakultet. Megjithatë, ai sqaroi se nuk ka caktuar një afat kohor për largimin nga politika, duke u shprehur se është i motivuar për të vazhduar punën për qytetarët.
"Kur ta mbaroj këtë pjesë të jetës sime si Kryeministër, do të kthehem në fakultet me studentët. Ende kam shumë gjëra për të bërë për qytetarët dhe shtetin, sepse nga ky rol mund të shoh saktësisht se çfarë është bërë gabim në dekadat e fundit", deklaroi Mickoski.
Kryeministri shtoi se angazhimi i tij primar mbetet zbatimi i drejtësisë brenda kompetencave të tij. Ai pranoi se përballet me sfida, por u zotua se do të vazhdojë të punojë me përkushtim për të përmirësuar kushtet e jetesës për qytetarët, duke kërkuar një rezultat edhe më të mirë në zgjedhjet e ardhshme krahasuar me fitoren e dy viteve më parë.