Mijëra tifozë, futbollistë dhe përfaqësues të klubeve spanjolle u mblodhën të shtunën në stadiumin e Tenerife-s për t’i dhënë lamtumirën sulmuesit Jesus de Miguel, i cili vdiq në moshën 30-vjeçare pas një ataku kardiak. Ceremonia u zhvillua në Estadio Heliodoro Rodríguez López, në Santa Cruz de Tenerife.
De Miguel u përplas me portierin e Andorrës, Jesus Owono, gjatë ndeshjes së së hënës. Pas incidentit, ai u transportua në spital dhe u shtrua në kujdes intensiv. Klubi i Tenerife-s konfirmoi se futbollisti vdiq të martën në mëngjes.
Në stadium ishte vendosur një banderolë gjigante me fotografinë bardhezi të futbollistit dhe mbishkrimin «Përgjithmonë Demi», nofkë me të cilën e thërrisnin miqtë e tij. Gjatë ceremonisë u shfaqën pamje nga debutimi i De Miguelit me fanellën e Tenerife-s, ndërsa të pranishmit brohoritën: «De Miguel, të duam».
Në homazhe morën pjesë futbollistë dhe përfaqësues të klubeve nga dy kategoritë kryesore të futbollit spanjoll. Mes tyre ishte edhe drejtori i Real Madridit, Emilio Butragueño.
Kapiteni i Tenerife-s, Enric Gallego, mbajti një fjalim në nderim të shokut të skuadrës. «Të flasësh për ty në kohën e shkuar është jashtëzakonisht e padrejtë. Është ende e vështirë të besohet se kjo na ka ndodhur neve, Demi. Ti gjithmonë do të jesh një nga ne», tha ai. Gallego shtoi: «Ende po përpiqemi të pajtohemi me faktin se nuk do të jesh më me ne».
Homazhi 90-minutësh, i mbajtur në Santa Cruz de Tenerife, u përmbyll me fjalime nga drejtuesit e klubeve dhe një shërbesë fetare. Në shenjë respekti për futbollistin, të gjitha ndeshjet e futbollit spanjoll gjatë fundjavës nisën me një minutë heshtje.