Në sfidën e zhvilluar në Mapei Stadium, Milani nuk arriti të siguronte më shumë se një barazim përballë Sassuolos. Pjesa e parë u mbyll pa gola, me portierin Arijanet Muriç i cili u bë protagonist për vendasit përmes disa ndërhyrjeve të suksesshme, duke përfshirë një pritje vendimtare ndaj një gjuajtjeje me kokë të Strahinja Pavlloviq në minutën e 45+6.
Në pjesën e dytë, Milani e zhbllokoi rezultatin në minutën e 63-të me anë të Adrien Rabiot, i cili realizoi pas një asistimi nga Luka Modric. Avantazhi i miqve zgjati vetëm pesë minuta, pasi në minutën e 68-të, Cas Odenthal shfrytëzoi një top të mbetur në zonë dhe shënoi golin e barazimit për Sassuolon. Ndonëse skuadrat kërkuan golin e fitores, rezultati mbeti i pandryshuar deri në vërshëllimën përfundimtare. Për Milanin u aktivizua edhe Ardon Jashari, i cili hyri në lojë në minutën e 78-të. Pas kësaj jave, Milani pozicionohet në vendin e pestë me 12 pikë, ndërsa Sassuolo renditet në vendin e dhjetë me 8 pikë.