Milan është ndëshkuar nga Gjykatësi Sportiv i Serie A me një gjobë prej 20 mijë euro për vonesa në hyrjen në fushë gjatë ndeshjes ndaj Parmës në San Siro.
Sipas vendimit zyrtar, klubi kuqezi u sanksionua për përgjegjësinë objektive, pasi shkaktoi pa arsye një vonesë prej rreth 4 minutash në nisjen e ndeshjes dhe rreth 3 minutash në fillimin e pjesës së dytë. Raporti thekson se bëhet fjalë për përsëritje të vazhdueshme të kësaj shkeljeje gjatë sezonit.
Ky fenomen është shfaqur disa herë gjatë kampionatit dhe nuk përjashtohet mundësia që të jetë një mënyrë për të ushtruar presion psikologjik ndaj kundërshtarëve. Me këtë sanksion, shuma totale e gjobave të Milanit vetëm për vonesa arrin 85 mijë euro këtë sezon.
Lecce regjistron shumën më të lartë të gjobave në Serie A, me 105 mijë euro, kryesisht për hedhjen e fishekzjarrëve dhe tymueseve nga tifozët.