Këtë të hënë, miliona iranianë iu bashkuan procesionit mortor të ish-liderit suprem të Iranit, Ali Khamenei, në Teheran. Pjesëmarrësit, të veshur me të zeza, përshkuan itinerarin nga Sheshi i Revolucionit drejt Sheshit Azadi, duke mbajtur flamuj, fotografi të të ndjerit dhe pankarta me sloganin “Ne do të ngrihemi”. Ceremonia pason homazhet dyditore të zhvilluara në Xhaminë e Madhe Mosalla.
Presidenti i Iranit, Masoud Pezeshkian, deklaroi se pjesëmarrja masive dëshmon unitetin e popullit iranian, duke hedhur poshtë pretendimet se emocionet e shfaqura nga qytetarët ishin të inskenuara. Gjatë kortezhit, të pranishmit kërkuan hakmarrje për vrasjen e Khameneit, duke bërë thirrje edhe kundër SHBA-së dhe Izraelit. Autoritetet bënë të ditur se lideri i ri suprem, Mojtaba Khamenei, nuk mori pjesë në ceremoni për arsye sigurie.
Sipas mediave shtetërore, si Tasnim dhe IRIB, procesioni pritet të zgjasë nga 10 deri në 12 orë. Itinerari prej 10 kilometrash përfshin transportimin e arkivolit drejt Aeroportit Mehrabad. Pas Teheranit, trupi i të ndjerit do të dërgohet në qytetet e shenjta shiite të Qom, Najaf dhe Karbala, përpara kthimit përfundimtar në Iran. Varrimi është parashikuar të zhvillohet më 9 korrik në qytetin e Mashhad.
Përditësime
Autoritetet iraniane njoftuan se 20 milionë qytetarë morën pjesë në procesionin mortor të Ali Khameneit në Teheran. Ngjarja shënoi rishfaqjen publike të ish-presidentit Mahmoud Ahmadinejad, i cili hodhi poshtë zërat për vdekjen e tij. Ndërkohë, u konfirmua mungesa e ish-presidentëve Mohammad Khatami dhe Hassan Rouhani. Në ceremoni ishin të pranishëm Ministri i Jashtëm Abbas Araghchi dhe kryetari i Parlamentit Mohammad Bagher Ghalibaf.