Ministri i Rinisë dhe Sportit të Kosovës, Blerim Gashani, priti në takim Iakovos Filippousis, sekretar i përgjithshëm i Komitetit Ndërkombëtar të Lojërave Mesdhetare, dhe Ismet Krasniqi, president i Komitetit Olimpik të Kosovës, së bashku me bashkëpunëtorët e tyre. Në takim mori pjesë gjithashtu zëvendësministrja Daulina Osmani.
Gjatë takimit u diskutua organizimi i Lojërave Mesdhetare Prishtina 2030, një ngjarje ndërkombëtare që do të promovojë sportin dhe do të rrisë prezencën e Kosovës në arenën ndërkombëtare. Ministri Gashani e cilësoi këtë organizim prioritet kombëtar dhe mundësi historike për vendin, me ndikim të drejtpërdrejtë në zhvillimin e sportit.
Palët u fokusuan në forcimin e bashkëpunimit ndërkombëtar, koordinimin e përpjekjeve mes institucioneve vendore dhe ndërkombëtare, si dhe përgatitjet për të garantuar suksesin e ngjarjes. Theks u vu në përmbushjen e standardeve organizative.
Ministri Gashani riafirmoi gatishmërinë për bashkëpunim të vazhdueshëm dhe të frytshëm. Pjesëmarrësit e uruan për pozicionin e tij dhe konfirmuan përkushtimin për të ndërtuar një të ardhme të suksesshme për sportin dhe rininë në Kosovë.