Ministri për Evropën dhe Punët e Jashtme, Ferit Hoxha, zhvilloi një takim zyrtar në Romë me Piero Fassino, i cili mban detyrën e zëvendëspresidentit të Komitetit të Mbrojtjes në Dhomën e Deputetëve të Italisë dhe presidentit të Komitetit të Ballkanit në Asamblenë Parlamentare të Këshillit të Evropës.
Gjatë takimit, palët vlerësuan përparimin e Shqipërisë në procesin e integrimit evropian, duke u ndalur te përmbushja e standardeve që mundësuan miratimin e IBAR. Ministri Hoxha rikonfirmoi përkushtimin e qeverisë shqiptare për mbylljen e kapitujve negociues, duke e cilësuar këtë synim si një prioritet strategjik për dekadën në vijim.
Diskutimi u përqendrua edhe te ruajtja e stabilitetit në Ballkanin Perëndimor. Pjesëmarrësit nënvizuan se zgjerimi i Bashkimit Evropian mbetet një politikë kyçe për nxitjen e transformimit dhe prosperitetit në rajon. Sipas ministrit Hoxha, në një mjedis gjeopolitik kompleks, integrimi i rajonit është një imperativ për sigurinë dhe besueshmërinë e vetë Evropës. Në përfundim, palët ranë dakord për nevojën e shfrytëzimit të momentumin aktual përmes reformave të mëtejshme dhe bashkëpunimit rajonal.