Ministri për Evropën dhe Punët e Jashtme, Ferit Hoxha, reagoi këtë të diel lidhur me tensionet e shënuara gjatë protestës së 35-të të mbajtur para Kryeministrisë. Përmes një komunikimi në rrjetin social “X”, ministri dënoi devijimin e protestës nga kërkesat qytetare drejt dhunës, duke e cilësuar këtë si papërgjegjshmëri.
Në qëndrimin e tij, Hoxha veçoi simbolikën e arkivolit të vendosur në protestë si një rikthim të praktikave të kaluara. Ai e përshkroi atë si një pamje “déjà vu” që nuk i shërben demokracisë. Ministri theksoi se liria dhe të drejtat qytetare janë fryt i dialogut dhe pjekurisë shoqërore, ndërsa intimidimi nuk është rruga për zhvillimin e vendit.
“Nga flamingot te arkivoli. Nga mbrojtja e mjedisit te gjyqi publik. Nga shqetësimi qytetar te papërgjegjshmëria. Nga protesta paqësore te dhuna. Nga vizioni për një Shqipëri të Re te rikthimi i një Shqipërie déjà vu – të vjetër, të kapërcyer dhe të papranueshme”, shkroi ministri.
Sipas tij, aspirata për një Shqipëri anëtare të Bashkimit Evropian deri në vitin 2030 kërkon bashkëpunim dhe përkushtim për të ndërtuar një të ardhme demokratike, larg akteve të imponimit. Ky reagim pason deklaratat e mëparshme të kryeministrit Edi Rama dhe ministrit Taulant Balla, të cilët gjithashtu shprehën qëndrim kritik për zhvillimet e protestës.