Maxime Prevot, zëvendëskryeministër dhe ministër i Punëve të Jashtme të Belgjikës, zhvillon vizitë zyrtare në Kosovë, ku takohet me krerët e qeverisë kosovare.
Takimi me kryeministrin Albin Kurti mbahet në ndërtesën e Qeverisë në Prishtinë, duke filluar nga ora 13:30. Mediat mund të marrin pamje para nisjes së takimit. Më pas, në orën 15:15, Prevot takohet me zëvendëskryeministrin e parë dhe ministrin e Punëve të Jashtme dhe Diasporës, Glauk Konjufca. Pas këtij takimi, palët mbajnë konferencë të përbashkët për media.
Vizita e kryediplomatit belg është pjesë e një turi në Ballkanin Perëndimor. Ai qëndron në Kosovë, Mal të Zi, Serbi, Maqedoni të Veriut dhe Bosnjë e Hercegovinë. Shqipërinë do ta vizitojë në një fazë tjetër, kur planifikohet hapja e ambasadës belge në Tiranë.
Duke njoftuar për vizitën rajonale, Prevot thekson rëndësinë e ruajtjes së një perspektive të besueshme integrimi për gjashtë vendet e Ballkanit Perëndimor. Procesi, sipas tij, mbetet i bazuar në meritë dhe kërkon zbatim të reformave në lidhje me sundimin e ligjit, sistemin gjyqësor, luftën kundër korrupsionit dhe pajtimin rajonal.
Përditësime
Maxime Prevot takohet me ushtruesen e detyrës së presidentes, Albulena Haxhiu, në orën 16:00.