Abbas Araghchi, ministër i Jashtëm i Iranit, deklaroi në një intervistë për Al Jazeera se nuk zhvillohen negociata formale me Shtetet e Bashkuara në kuadër të konfliktit me Izraelin dhe SHBA-në.
Ai pranoi se merr mesazhe drejtpërdrejt nga i dërguari i posaçëm i Donald Trump-it, Steve Witkoff, ose përmes Departamentit të Shtetit dhe vendeve mike në rajon. Megjithatë, Araghchi theksoi se ky shkëmbim nuk përbën negociata. “Të gjitha mesazhet përcillen përmes Ministrisë së Jashtme ose merren prej saj, ndërsa ekziston komunikim edhe mes shërbimeve të sigurisë”, u shpreh ai.
Sa i përket propozimeve amerikane, ministri iranian mohoi se Irani ka dërguar përgjigje ndaj 15 propozimeve të SHBA-së. “Nuk kemi dërguar asnjë përgjigje ndaj tyre dhe as nuk kemi paraqitur propozime apo kushte tona”, deklaroi Araghchi. Kjo vjen pavarësisht raportimeve të mëparshme nga Tasnim News Agency që pretendonin të kundërtën.
Irani nuk do të pranojë armëpushim, përveçse në rastin e një ndalimi të plotë të luftës në të gjithë rajonin. Teherani kërkon garanci kundër sulmeve të reja dhe kompensim për dëmet. Ai shtoi se vendi është “i gatshëm për çdo përballje tokësore”.