Ministri i Mbrojtjes, Pirro Vengu, deklaroi gjatë mbledhjes së grupit parlamentar të Partisë Socialiste se viti 2026 do të shënojë rinisjen e industrisë ushtarake shqiptare. Ai theksoi se rritja e buxhetit të mbrojtjes do të përkthehet në forcim të kapaciteteve ushtarake, zhvillim ekonomik dhe inovacion.
Prodhimi dhe investimet ushtarake
Në prill nis linja e prodhimit të dronëve taktikë, me rekrutime për 12 inxhinierë që do të trajnohen në bashkëpunim me partnerë izraelitë. Në maj fillon prodhimi i uniformave për ushtrinë dhe Policinë e Shtetit, si dhe hapet Shkolla e Aviacionit, për të cilën janë porositur dy helikopterë trajnues. Në qershor dalin mjete emergjencash dhe transporti në bashkëpunim me kompaninë Ray Metal, ndërsa deri në dhjetor pritet prodhimi i sistemeve antidronë, ngritja e dy qendrave rajonale për emergjencat civile dhe blerja e dy avionëve.
Negociatat me kompaninë italiane Fincantieri janë finalizuar për prodhimin e anijeve luftarake në bazën e Pashalimanit, duke hapur rrugën për një kompani të përbashkët. Janë themeluar katër kompani ku shteti është aksionar, si dhe janë nënshkruar gjashtë kontrata për municione, uniforma dhe mjete taktike.
Emergjencat civile dhe kapitali njerëzor
Fondet për emergjencat civile janë shpërndarë për 47 bashki, me rritje të buxheteve: trefishim në Lezhë dhe Gramsh, gjashtëfishim në Përrenjas dhe shtatëfishim në Delvinë. Kanë miratuar 8 milionë euro për infrastrukturën parandaluese, 10 milionë euro për prita dhe ura, si dhe 2 milionë euro shtesë për rinovimin e flotës së emergjencave, me uniforma dhe mjete Made in Albania.
Sa i përket kapitalit njerëzor, në 14 muajt e fundit janë rekrutuar 1 000 ushtarakë aktivë, ndërsa numri i largimeve është ulur me 70%.