Ministri i Punëve të Brendshme, Besfort Lamallari, zhvilloi sot një takim me drejtuesit vendorë të Policisë së Shtetit dhe të strukturave të Policisë Kufitare, me pjesëmarrjen edhe të Drejtorit të Përgjithshëm të Policisë së Shtetit, Skënder Hita. Takimi kishte si qëllim kryesor forcimin e standardeve të shërbimit ndaj qytetarëve dhe rritjen e besimit të publikut te ky institucion.
Gjatë bashkëbisedimit, ministri Lamallari vuri theksin te nevoja për një strukturë policore të orientuar drejt qytetarit, e cila garanton një shërbim profesional, etik, të shpejtë dhe në përputhje të plotë me ligjin. Ministri theksoi se etika nuk duhet të shihet si një standard i jashtëzakonshëm, por si minimumi i detyrueshëm në sjelljen dhe komunikimin e çdo punonjësi të Policisë. Sipas tij, shërbimi cilësor dhe respektimi i ligjit janë ato çfarë presin dhe meritojnë qytetarët.
Në këtë takim, drejtuesve vendorë iu kërkua që këto standarde të jenë pjesë e pandashme e punës së përditshme të strukturave policore, duke garantuar reagim të shpejtë dhe të drejtë ndaj çdo shqetësimi, ankese apo kërkese për informacion. Ministri i Brendshëm kërkoi gjithashtu vëmendje të shtuar ndaj komunikimit me publikun, duke e vlerësuar çdo kontakt të qytetarit me policinë si një mundësi për të forcuar besimin te institucioni. Forcimi i marrëdhënies Polici–Qytetar, rritja e profesionalizmit dhe respektimi rigoroz i ligjit u cilësuan si elementë thelbësorë për një Polici më të përgjegjshme dhe më pranë komunitetit.