Ministri Nufi pret ambasadorin e ri amerikan Eric Wendt

Ministri i Mbrojtjes, Ermal Nufi, zhvilloi sot, më 2 tetor 2026, një takim me ambasadorin e ri të Shteteve të Bashkuara të Amerikës në Tiranë, Eric Wendt. Në fokus të bisedimeve ishte bashkëpunimi dypalësh në fushën e mbrojtjes dhe sigurisë, si dhe kontributi i Shqipërisë në nismat ndërkombëtare. Gjatë këtij takimi, ministri Nufi vlerësoi SHBA-në si partner të pazëvendësueshëm. Ai nënvizoi se Shqipëria ofron një pozicion gjeografik me rëndësi, besueshmëri dhe vullnet për të bashkëpunuar me aleatët. Në deklaratat pas takimit, ministri vuri në dukje se projekte infrastrukturore dhe ushtarake, si Korridori VIII, porti i Porto Romanos dhe Baza Ajrore Kuçovë, si dhe kapacitetet për mbështetjen e vendit pritës, luajnë një rol kyç në rritjen e lëvizshmërisë dhe forcimin e arkitekturës së NATO-s në Evropën Juglindore. Ministri Nufi theksoi gjithashtu angazhimin aktiv të Shqipërisë në operacionet ndërkombëtare të paqes dhe stabilitetit. Ai përmendi mbështetjen për Ukrainën, praninë në misionin e KFOR-it, si dhe vendimin për pjesëmarrje në Forcën Ndërkombëtare të Stabilizimit në Gaza. Sipas ministrit, këto veprime dëshmojnë se Shqipëria është shndërruar në një aleate të besuar që kontribuon konkretisht për sigurinë dhe paqen në arenën globale, duke qëndruar “krah për krah” me Shtetet e Bashkuara.