Ministri i Bujqësisë dhe Zhvillimit Rural, Andis Salla, ka reaguar pas publikimit të një fotoje nga kryetari i Partisë Demokratike, Sali Berisha, ku shfaqeshin fermerë duke derdhur qumësht para një ministrie. Përmes një deklarate, ministri Salla hodhi poshtë pretendimet se ngjarja ka ndodhur në Shqipëri.
Sipas ministrit, përdorimi i këtyre pamjeve është një përpjekje për të mashtruar opinionin publik. "Kur nuk ke çfarë t’u tregosh shqiptarëve, zgjedh të publikosh pamje që nuk janë nga Shqipëria dhe t’i paraqesësh si të ishin realiteti ynë", u shpreh ministri, duke theksuar se fermerët nuk duhet të përdoren si dekor për propagandë politike.
Ministri Salla theksoi se institucioni që ai drejton mbetet i angazhuar për mbështetjen e bujqësisë vendase përmes investimeve dhe politikave financiare. Ai shtoi se kush zgjedh manipulimin tregon se i kanë mbaruar argumentet, duke shtuar se e vërteta nuk ndërtohet me pamje të huazuara.
Në bazë të informacioneve të raportuara, pamjet i përkasin një proteste të fermerëve në Kosovë, të cilët kërkuan nisjen e grumbullimit të qumështit, pasi ky proces ishte ndaluar përkohësisht për një periudhë prej katër ditësh.