Toni Gogu, Ministri i Shtetit për Marrëdhëniet me Parlamentin, ka reaguar në rrjetet sociale ndaj protestës së fundit të opozitës në Tiranë.
Në postimin e tij, Gogu shprehet se ata që pretendojnë të jenë zëri i qytetarëve nuk përfaqësojnë aspiratat reale të tyre. “Këta pretendojnë të jenë zëri i qytetarëve a thua se qytetarët duan zjarr e flakë! Por ndaj dalin në zgjedhje ashtu siç dalin”, shkruan ministri.
Sipas tij, qytetarët shqiptarë kërkojnë stabilitet, punë të përditshme dhe zgjidhje konkrete për problemet e tyre, jo tensione apo përplasje politike.
Gogu përfundon duke thënë: “Qytetarët duan Shqipërinë europiane që vështirësitë dhe problemet që ka i zgjidh me punë të përditshme! Dhe Shqipëria nuk ndalet!”
Reagimi vjen në kontekstin e protestës së opozitës, e cila sipas burimeve ka shkaktuar tensione para Kryeministrisë.