Mircea Lucescu, trajneri 80-vjeçar i kombëtares rumune, do të drejtojë ekipin të enjten në ndeshjen playoff kundër Turqisë për një vend në Botërorin 2026. Rumanisë i mungon pjesëmarrja në këtë garë prej 28 vitesh.
Prej muajsh, Lucescu vuan nga një sëmundje, natyrën e së cilës nuk e ka bërë publike për të shmangur vëmendjen e tepruar. Gjatë këtij periudhe, ai është shtruar 3 herë në spital, por ka mbajtur kontakt të ngushtë me lojtarët dhe stafin, duke analizuar ndeshjet e kundërshtarit.
Në një intervistë për gazetën britanike Guardian, në prag të sfidës, Lucescu shpjegoi vendimin e tij. "Kur mjekët më thanë se mund të vazhdoja të stërvisja, u përqendrova tek ajo që duhet të bëj për Rumaninë", tha ai. Ai shtoi se ka diskutuar me federatën rumune, e cila nuk ka gjetur një zgjidhje alternative. "Nuk jam në formën time më të mirë dhe do të tërhiqesha po të kishte një opsion tjetër. Por nuk mund të iki si frikacak. Besojmë te mundësitë tona për t’u kualifikuar."
Ndeshja do të zhvillohet në stadiumin e Beşiktaşit në Stamboll, ku Lucescu paralajmëron për një atmosferë të vështirë. "E njoh mirë atë ambient. Nuk e di nëse ka mënyrë për të zbutur zhurmën që do të krijojnë. Duhet t’ua shpjegoj lojtarëve, veçanërisht atyre që nuk kanë luajtur kurrë në Turqi, çfarë i pret."