Mojtaba Khamenei, udhëheqës suprem i Iranit, deklaroi se përgjegjësit për vrasjen e Ali Larijanit, kryetar i Këshillit të Lartë të Sigurisë Kombëtare, do të ndëshkohen së shpejti. Në një deklaratë zyrtare dhe mesazh në Telegram, ai theksoi se “kriminelët duhet të paguajnë së shpejti për gjakun e tij” dhe “çdo gjak ka një çmim”.
Këshilli i Lartë i Sigurisë Kombëtare konfirmoi vdekjen e Larijanit një ditë më parë, disa orë pasi autoritetet izraelite njoftuan sulmin e synuar në Teheran. Në sulmin e orëve të para të mëngjesit humbën jetën edhe djali i tij, një zyrtar tjetër i Këshillit dhe disa truprojë.
Garda Revolucionare Islamike konfirmoi vdekjen e gjeneralit Gholamreza Soleimani, drejtues i forcës paraushtarake Basij, të vrarë nga ushtria izraelite. Në faqen zyrtare Sepah News, Garda e cilësoi ngjarjen si “akt terrorist të armikut amerikano-sionist”.
Në llogarinë e Larijanit në platformën X u publikua një mesazh drejtuar popullit iranian, botës myslimane dhe popujve të lirë, ku ai e quajti veten martir. Garda deklaroi se ka lëshuar raketa në Izraelin qendror si hakmarrje dhe paralajmëroi për veprime të tjera. “Gjaku i këtij martiri do të jetë burim nderi dhe fuqie kundër arrogancës globale”, thanë ata.
Agjencitë Fars dhe Tasnim raportuan se funeralet për Larijanin dhe Soleimanin planifikohen të mbaheshin të mërkurën, së bashku me ato të mbi 80 marinarëve iranianë të vrarë në një sulm amerikan ndaj fregatës pranë Sri Lankës. Agjencia Mehr publikoi foto të arkivolit të tij dhe djalit, por nuk është e sigurt nëse funeralet do të zhvillohen siç ishte paraparë.