Një shkëmbim zjarri gjatë një ndërhyrjeje të forcave të rendit në lagjen Côte-des-Neiges të Montrealit ka shkaktuar vdekjen e një oficeri policie dhe të personit të dyshuar. Ngjarja ka shkaktuar panik te qytetarët që ndodheshin në zonë.
Dëshmitarët okularë kanë raportuar se intensiteti i shkëmbimit të zjarrit ishte i lartë, duke deklaruar se janë dëgjuar rreth 30 të shtëna. Si pasojë e përplasjes, xhamat e një ndërtese në katin e gjashtë janë thyer, ndërsa banorët e zonës u njoftuan përmes një alarmi emergjence për të shmangur lëvizjet derisa operacioni të përfundonte.
Pas ndërhyrjes, autoritetet konfirmuan se i dyshuari ishte neutralizuar, ndërsa oficeri i policisë ndërroi jetë si pasojë e plagëve të marra gjatë shkëmbimit të zjarrit. Aktualisht, hetimet janë në zhvillim e sipër për të zbardhur shkaqet dhe rrethanat e plota të ngjarjes. Deri në këto momente, identiteti i viktimave apo motivet e incidentit nuk janë bërë ende publike nga autoritetet kanadeze.
Përditësime
Hetimi për shkëmbimin e zjarrit në Montreal, ku mbetën të vrarë një oficer policie dhe autori i dyshuar, është thelluar pas publikimit të pamjeve të sulmit. Zhvillimet e fundit konfirmojnë se:
- Një oficere e dytë ndodhet në gjendje kritike për jetën.
- Dëshmitarët raportojnë se të shtënat rrezikuan drejtpërdrejt qytetarët që ndodheshin në vendngjarje.