Rreth 10 mijë banorë të Shushicës, në Elbasan, vijojnë të jenë pa energji elektrike që prej mbrëmjes së kaluar, si pasojë e motit të keq. Ndërprerja ka lënë fshatrat e zonës në errësirë totale.
Mungesa e energjisë ka prekur familjet dhe bizneset lokale, të cilat përballen me probleme në funksionim, furnizim dhe ruajtje të produkteve ushqimore, sipas gazetarit Fatmir Popja.
Grupe të OSHEE-së ndodhen në terren për të identifikuar defektet dhe rikthyer sa më shpejt energjinë.
Ky nuk është rasti i parë i ndërprerjeve të gjata në zonë. Banorët shprehin shqetësim dhe pakënaqësi, veçanërisht familjet me fëmijë të vegjël, të moshuarit dhe personat me nevoja të veçanta.
Ata i bëjnë thirrje institucioneve përgjegjëse për zgjidhje të menjëhershme dhe masa afatgjata, pasi situata e përsëritur ndikon në cilësinë e jetës dhe sigurinë e komunitetit.