Për shkak të kushteve të pafavorshme atmosferike, Aeroporti Ndërkombëtar i Tiranës njoftoi të martën se shumica e fluturimeve kanë mundësi të ndikohen në aspektin e orarit të operimit.
Në një njoftim zyrtar, aeroporti u njoftoi pasagjerëve se për shkak të këtyre kushteve të motit, disa fluturime mund të kenë vonesa, ndërsa një numër fluturimesh janë anuluar plotësisht. Sipas burimeve, katër fluturime janë anuluar, përfshirë nisjet nga Tirana për në Milano, Venezia dhe Rimini në orët e para të ditës, si dhe një mbërritje nga Venezia në mëngjes.
Burimet teknike lidhin vonesat në orare edhe me shkreptimat që vështirësojnë operacionet ajrore. Megjithatë, operacionet në aeroport vijojnë normalisht, me ekipet e stafit që punojnë në koordinim të ngushtë për të garantuar mbarëvajtjen e shërbimeve pa ndërprerje.
"Për shkak të kushteve të pafavorshme atmosferike, disa fluturime mund të ndikohen në aspektin e orarit. Operacionet në Aeroportin Ndërkombëtar të Tiranës vazhdojnë normalisht, me ekipet që punojnë në koordinim të ngushtë për të siguruar shërbime të qeta dhe pa probleme në aeroport. Pasagjerët këshillohen të kontrollojnë statusin e fluturimit të tyre dhe të qëndrojnë në kontakt me linjën ajrore për përditësime," thuhet në njoftimin zyrtar të aeroportit.
Aeroporti u bëri thirrje të gjithë pasagjerëve që të kontrollojnë në mënyrë të rregullt statusin e fluturimit të tyre përmes sistemeve të informimit të aeroportit, si dhe të qëndrojnë në komunikim të vazhdueshëm me linjën ajrore përkatëse për të marrë përditësime të tjera mbi oraret. Siguria e pasagjerëve u vendos si prioritet absolut në të gjitha vendimmarrjet operative.
Përveç problemave në aeroport, kushtet e përkeqësuara atmosferike prekin edhe infrastrukturën rrugore. Rruga e Rinasit drejt Durrësit mbetet e aksesueshme, megjithëse në disa seksione të autostradës janë raportuar prezenca të ujit në të dyja anët e rrugës, sidomos në zonën e Shënavlashit afër Durrësit. Për pasagjerët që vijnë nga jugu, policia këshilloi të zgjedhin rrugën alternative të plepave për në Ndroq, duke kaluar përmes Tiranës dhe më pas të kthehen për në Rinas përmes autostradës. U sugjerua edhe rruga nga Rrogozhina drejt kryeqytetit si një opsion alternativ.
Stafi i aeroportit mbeti në koordinim të vazhdueshëm për të reaguar ndaj çdo zhvillimi dhe për të siguruar që pasagjerët të marrin informacionin më të freskët rreth statusit të operacioneve ajrore.