Kryetarët e Lëvizjes Vetëvendosje, Albin Kurti, dhe Lidhjes Demokratike të Kosovës, Lumir Abdixhiku, nuk kanë zhvilluar asnjë takim të ri pas diskutimeve të tyre të zhvilluara të mërkurën. Bisedimet fillestare mes palëve ishin fokusuar te gjetja e një emri konsensual për postin e presidentit dhe formimi i institucioneve të reja të vendit.
Nga LDK kanë bërë të ditur për televizionin Dukagjini se aktualisht nuk është planifikuar asnjë takim mes palëve. Nga ana tjetër, Lëvizja Vetëvendosje nuk ka dhënë njoftime nëse kanë ndodhur diskutime të tjera pas takimit të mërkurës. Në takimin e zhvilluar tri ditë më parë, të dyja palët kishin shprehur gatishmërinë për të gjetur një zgjidhje urgjente, duke përfshirë mundësinë e zgjedhjes së një presidenti jashtë sferës politike.
Analisti politik Albinot Maloku vlerëson se mungesa e takimeve të reja tregon një qasje që po konsumon kohë, me synimin për të kalkuluar proceset e ardhshme zgjedhore. Sipas Malokut, vendi ndodhet në një situatë të vështirë institucionale që nga 9 shkurti 2025, duke theksuar se kthimi në rendin kushtetues duhet të jetë prioritet. Ai konsideron se këto zhvillime po shkaktojnë regres në fusha të ndryshme, përfshirë arsimin dhe shëndetësinë, duke e cilësuar këtë si pasojë të vullnetit të subjektit politik dominant në Kuvendin e Kosovës.