Hekuran Murati, ministër i Financave, deklaroi në seancën plenare të Kuvendit të Kosovës, ku po shqyrtohet në lexim të dytë projektbuxheti për vitin 2026, se ky buxhet është i përkohshëm dhe emergjent.
Murati shpjegoi se Qeveria nuk ua ka dhënë hapësirën as ministrave për ndryshime, për shkak të kufizimeve kohore që mund të shkaktojnë probleme në zbatim. “Ky është një buxhet i përkohshëm emergjent dhe për këtë arsye ne si Qeveri nuk ua kemi dhënë hapësirën as ministrave që i kanë marrë dikasteret e tyre për të bërë ndryshime”, tha ai, duke rikonfirmuar deklaratën e deputetit Besnik Tahiri.
Gjatë ditës së djeshme, në mbledhjen e Komisionit janë shqyrtuar të gjitha amendamentet. Murati kërkoi që të mos mbështeten amendamente me implikime financiare, përveç disa korrigjimesh teknike. Sipas tij, amendamentet e vlefshme do të përfshihen në buxhetin e rishikuar, ku do të reflektohen prioritetet e Qeverisë.
Ai theksoi nevojën për miratim urgjent, pasi në mungesë të buxhetit, sipas ligjit, bëhen vetëm zgjatje për shpenzimet rrjedhëse, ndërsa asnjë projekt nuk mund të iniciohet apo të nisë prokurim. “Asnjë projekt nuk mund të iniciohet për prokurim për shkak se nuk ka buxhet dhe nuk mund të bëhet zotimi i mjeteve”, u shpreh Murati, duke përmendur shembullin e komunave.
Qëllimi është të sigurohet funksionimi normal i institucioneve dhe shërbimeve publike sa më shpejt, derisa buxheti të rishikohet më vonë.
Përditësime
Kuvendi miratoi Projektligjin për Buxhetin 2026 me 62 vota pro, 36 kundër dhe 0 abstenime.
Buxheti parashikon 4 miliardë euro, nga të cilat 3.64 miliardë të hyra fiskale, pjesa tjetër përmes kredish dhe deficitit.
Vetëm 5 amendamente kaluan: 3 teknike tekstuale dhe 2 tabelare për komunat. Rreth 80 amendamente të opozitës u refuzuan në Komisionin për Buxhet.
Projektligji u miratua në parim më 16 shkurt me 66 pro, 32 kundër dhe 5 abstenime.
Arian Tahiri (PDK) kritikoi defektet dhe tërhoqi amendamentet e tij. Jehona Lushaku (LDK) kundërshtoi mungesën e amendamenteve të opozitës.