Murtaja pneumonike shkakton vdekjen e një teknike në Rusi

Një teknike laboratori 28-vjeçare, e identifikuar si Daria Shipilova, ka humbur jetën nga murtaja pneumonike në Irkutsk, Rusi, pas një aksidenti në Institutin e Kërkimeve të Murtajës. Viktima ndërroi jetë në orët e para të 2 tetorit në njësinë e kujdesit intensiv të spitalit të qytetit Shelekhov. Sipas burimeve mjekësore, përpara se të konstatohej prania e patogjenit, ajo ishte trajtuar gabimisht në një njësi të specializuar për Covid-19, pasi stafi mjekësor nuk ishte në dijeni të ekspozimit të saj ndaj bakterit Yersinia pestis, që dyshohet se u përhap pas thyerjes së një epruvete gjatë orarit të punës.

Lajmi u bë publik fillimisht nga guvernatori i rajonit të Buryatias, Alexei Chidenov, ndërsa guvernatori i Irkutskut, Igor Kobzev, konfirmoi se rreth 200 persona që kanë pasur kontakte me viktimën janë vendosur në karantinë. Për shkak të natyrës së sëmundjes, spitalet në Irkutsk janë mbyllur dhe janë mbajtur në karantinë për tre javët e fundit. Autoritetet shëndetësore deklaruan se, pavarësisht situatës, personat e izoluar nuk kanë shfaqur simptoma deri më tani dhe testet e tyre kanë dalë negative.

Si pjesë e masave të sigurisë, autoritetet lokale kanë urdhëruar anulimin e të gjitha aktiviteteve publike në Irkutsk. Për më tepër, drejtoresha e Fabrikës së Aluminit në Irkutsk, Artem Fominikh, ka udhëzuar stafin e saj të mbajë maska si masë paraprake mbrojtëse. Policia ruse ka nisur një hetim zyrtar për shkelje të rregullave të sigurisë në punë që çuan në këtë incident fatal, ndërkohë që Ministria ruse e Shëndetësisë ende nuk ka dalë me një njoftim zyrtar.

Sipas Organizatës Botërore të Shëndetësisë, murtaja pneumonike është një formë e rëndë e sëmundjes që prek mushkëritë dhe përhapet përmes pikave të frymëmarrjes. Ajo konsiderohet tejet ngjitëse dhe paraqet rrezik fatal nëse nuk trajtohet me antibiotikë menjëherë pas diagnostikimit.