Elon Musk ka depozituar të premten një kërkesë gjyqësore në një gjykatë federale kundër OpenAI dhe Microsoft, duke kërkuar deri në 134 miliardë dollarë dëmshpërblim. Kërkesa vjen para nisjes së procesit gjyqësor kryesor, siç raporton Reuters të martën.
Sipas dokumenteve gjyqësore, OpenAI ka përfituar nga 65.5 deri në 109.4 miliardë dollarë si rezultat i rolit të Muskut në vitet e para, ndërsa Microsofti nga 13.3 deri në 25.1 miliardë dollarë.
Musk ishte bashkëthemelues i OpenAI në vitin 2015, kur kompania ishte ende startup. Avokati i tij kryesor, Steven Molo, deklaroi se "Pa Elon Muskun nuk do të ekzistonte OpenAI. Ai siguroi pjesën më të madhe të financimit fillestar, vuri në dispozicion reputacionin e tij dhe u mësoi themeluesve gjithçka që dinte për zgjerimin e një biznesi". Vlera e këtyre kontributeve është llogaritur nga një ekspert financiar.
OpenAI e ka cilësuar kërkesën si "jo serioze". Microsofti nuk ka komentuar mbi shumën e kërkuar, por një avokat i saj ka thënë më herët se nuk ka prova që kompania të ketë ndihmuar apo nxitur OpenAI në shkelje ligjore.
Gjatë javës, OpenAI dhe Microsofti kanë paraqitur kundërpadi, duke kundërshtuar shumat e dëmeve të pretenduara nga Musku.