Myftiu Naim Tërnava ka mbajtur ligjëratë për qytetarët në Xhamia e Madhe në Prishtinë me rastin e Fitër Bajramit më 20 mars 2026. Në këtë rast, ai u është drejtuar akterëve politikë me thirrje për të gjetur zgjidhje përmes dialogut dhe për të shmangur ngecjen e vendit.
Ai theksoi se “është e papranueshme që sot, në kohë paqeje dhe në kushtet e një sistemi demokratik, njerëzit të vuajnë për shkak të mungesës së vullnetit politik për kompromis”. Tërnava kërkoi dialog, përgjegjësi dhe vetëdije nga e gjithë skena politike, duke shtuar se “në momente të tilla kërkohet maturi, vetëdije dhe tolerance”.
Sipas tij, interesi i vendit dhe i kombit duhet të vendoset mbi çdo interes tjetër përmes dialogut dhe sakrificës. “Shoqëria jonë ka nevojë për më shumë maturi në politikë, për më shumë kulturë dialogu dhe për më shumë ndjenjë përgjegjësie ndaj interesit publik”, deklaroi ai.
Në fund të ligjëratës, Tërnava u lut për bekim hyjnor: “Lutemi Zotit që të na bekojë me maturi dhe drejtësi, që të jemi në nivel të përgjegjësisë që mbajmë për të ardhmen e vendit dhe kombit, qoftë si individë apo si shoqëri. Zoti i Madhërishëm na bëftë prej atyre që ndërtojnë ura të forta, rini të shëndoshë dhe një shoqëri me besim në vete dhe dashuri për atdheun.”