Arbenita Nagavci, shefja e Grupit Parlamentar të Lëvizjes Vetëvendosje, deklaroi se Vjosa Osmani ka pasur një performancë shumë të mirë gjatë mandatit si presidente. Kjo deklaratë u bë në emisionin Debat Plus më 25 shkurt 2026.
Ajo u shpreh se të gjithë janë dëshmitarë të përfaqësimit të mirë që Osmani i ka bërë vendit. "Të gjithë jemi dëshmitarë se Vjosa Osmani gjatë përfaqësimit që i ka bërë Kosovës si presidente e vendit, ka pasur një performancë shumë të mirë", tha ajo.
Nagavci theksoi se për rizgjedhjen nevojiten së paku 80 vota nga deputetët në raundin e parë dhe të dytë. "Për të qenë presidente duhet pasur votat e së paku 80 deputetëve. Në këtë pikë është tejet e rëndësishme që me partitë tjera ta përmbyllim suksesshëm këtë proces dhe vendi të vazhdojë funksionimin me institucione të cilat janë në kompetencë të plotë", deklaroi ajo.
Ajo potencoi se aktualisht ka konsensus për 66 vota. "Ne kemi 66 vota për të cilat kemi një konsensus, kemi kompromis dhe nuk do të kemi dilema për këto vota për presidentin. Por duhen edhe së paku 14 vota të sigurta në mënyrë që të vazhdojmë tutje. Duhet të sigurohemi që Vjosa Osmani i ka 80 vota", u shpreh Nagavci.
Sipas saj, në zgjedhjet e fundit Lëvizja Vetëvendosje ka garuar për qeveri, pasi posti i presidentes ka qenë në mandat të plotë. Ndërsa në vitin 2021, ata kishin synuar bashkërisht edhe pozitën e presidentit.