Arbërie Nagavci, shefja e grupit parlamentar të Lëvizjes Vetëvendosje, deklaroi në seancën e Kuvendit të Kosovës se partia e saj nuk synon ndikim në media dhe kërkon vetëm raportim korrekt. Kjo erdhi pas komenteve të kryeministrit Albin Kurti për raportimet rreth financimeve të mediave me thasë parash.
Nagavci u bëri thirrje organeve kompetente të angazhohen seriozisht për çështjen e financimit të mediave. Ajo theksoi se mediat duhet ta kryejnë detyrën me ndershmëri dhe përgjegjësi.
"Besoj që organet kompetente do të angazhohen me shumë seriozitet për këtë çështje. Ju lus të gjithë ju që ndiheni rehat me punën e ndershme e transparente për qytetarët, të vazhdoni raportimin korrekt. Apeloj te organet kompetente që të zhvillojnë hetimet, sepse deklaratat e kryeministrit dhe të personave të tjerë bazohen në raportime dhe fakte që po trajtohen", tha ajo.
Nagavci ritheksoi se Vetëvendosja nuk i frikësohet të vërtetës apo mediave dhe se ndikimi në to nuk ka qenë kurrë qëllimi i partisë. "Kërkesat tona janë që secili, përfshirë deputetët dhe mediat, ta kryejë detyrën sipas përgjegjësive. Ndikimet në media në të kaluarën nuk kanë qenë dhe nuk do të jenë synim i Vetëvendosjes", deklaroi ajo.